Кај министерот за надворешни работи нештата се прекршиле со инцидентот во Бањска на северот од Косово. Тој сега го застапува истиот став како и албанската опозиција
Министерот за надворешни работи, Бујар Османи, поради инцидентот во Бањска на северот од Косово, кога имаше пресметка со парамилитарни српски структури, сака да биде напуштен целиот проект Отворен Балкан во кој беа вложени многу труд, енергија и политички желби. Таков предлог тој ќе достави до Владата кога ќе се расправа на таа тема.
Со неговата денешна изјава тој го зазеде истиот став како и албанската опозиција, но во исто време ѝ порача дека таа сакала со таквиот предлог политички да профитира. Тој уште додаде дека по инцидентот во Бањска не присуствувал на ниту еден состанок на иницијативата Отворен Балкан.
Така, македонското учество во Отворен Балкан може да стане жртва на предизборните битки во албанскиот политички кампус во ситуација, кога и двете структури се повикуваат на албанскиот премиер Еди Рама.
Оваа најава на Османи доаѓа по објавата дека водечките вина од Србија, Македонија и Албанија ќе бидат претставени во павилјонот „Винска визија на Отворен Балкан“ организиран од Стопанската комора на Србија на саемот за вино „Винитали“ во Верона од 14 до 17 април, пред околу 1.200 најголеми купувачи и бројни учесници и посетители.
