Потпретседателот на ВМРО-ДПМНЕ, Тимчо Муцунски, вели дека тој лично не ја познава професорката Билјана Ванковска, кандидатка на Левица за шеф на државата, и затоа не би можел да каже дали таа имала улога на „помагач“ на изборите во 2019 година Гордана Силјановска-Давкова да победи во претседателската трка. Ова беше одговорот на Муцунски прашан дали знае на што мисли Ванковска кога вели: „Мицко ме нарече измеќарка. Во право е, измеќарка им бев во 2019 година кога се отепав од работа. Си знаат добро што работев, а можам и да ги потсетам ако заборавиле“.
Но, според потпретседателот на ВМРО-ДПМНЕ, од она што тој со сигурност може да го каже е дека секој глас за Левица и за кандидатите на Левица на претстојните двојни избори е скриен глас за СДСМ и дека овој факт е очигледен. Сепак, проценува тој, кај граѓаните се развива зрелост со која тие го препознаваат тоа и покрај тоа што Левица негодува за ваквите ставови на ВМРО-ДПМНЕ.
Првиот вицепремиер Бојан Маричиќ, пак, во интервју за „360 степени“ на МРТ 1 негира дека владејачката партија учествувала во собирањето потписи за кандидатите на Левица и на ГРОМ, Билјана Ванковска-Цветковска и Стевче Јакимовски, да влезат во трката за претседател на државата. Според Маричиќ, станува збор за суверена одлука на секој политички субјект и партиите, како што вели, треба да се навикнат дека е нормално да има повеќе кандидати.
Лидерот на ВМРО-ДПМНЕ, Христијан Мицкоски, вчера изјави дека улогата на Ванковска и на Јакимовски во првиот круг од претседателските избори ќе биде само да го поткопаат потенцијалот на Гордана Силјановска-Давкова.
