Претседателскиот кандидат на коалицијата Вреди, Арбен Таравари потврди денес дека нема да коалицираат со партија која е против уставните измени и е против бришењето на дваесете проценти за албанскиот јазик. Таравари упати покана до противкандидатите за дебата, но ги наведе само имињата на Стево Пендаровски, Бујар Османи и Максим Димитриевски oд кои, како што рече, имал телефонски број. Практично, тој како и Бујар Османи, ги прескокна Стевчо Јакимовски и Билјана Ванковска, како да ќе му бидат коалициони партнери, а не противници на изборите.
Таравари рече дека предуслов за започнување на преговорите за коалицирање е европскиот пат за Македонија, истакнувајќи дека двете македонски партии во одредени периоди кажале дека ова не им пречи. Според него, разумен период е до 15 септември да бидат донесени уставните измени. Околу 20-те проценти рече дека тоа не е ништо ново и не очекува некој да е против.
„Мицкоски некаде во април или март имаше интервју за „Коха“ каде рече дека не му пречи тоа, Заев исто така го кажа тоа кога се случи Преспанскиот договор, Ковачевски и Пендаровски исто така. Мислам дека тоа е веќе нешто што постоело во Македонија, не е нешто ново. Со Уставот од 1974 година во Македонија официјални јазици беа македонски, албански, турски, немаа ни проценти ни бројка. Ако ни најдат еден Устав во светот каде што употребата на јазик на која било етничка заедница стои со проценти или бројки, ние ќе го тргнеме ова“, рече Таравари.
