Преку LoGeS, првиот софтвер за е-услуги на локално ниво, се дигитализираат услугите за жителите на 18 општини
Жителите и компаниите во 18 општини добиваат пристап до дел од општинските услуги по дигитален пат преку имплементација на LoGeS – првиот софтвер за е-услуги на локално ниво во државата.
Дигитализираните услуги стануваат достапни за над 254.000 граѓани во 11 општини во Источниот плански регион, пет општини во Вардарскиот плански регион, како и во општините Радовиш и Конче. Оваа активност претставува позитивен пример за подобрување на квалитетот на живот на граѓаните преку проекти за меѓуопштинска соработка чии носители беа општините Велес, Штип и Радовиш.
Платформата LoGeS обезбедува нов и високо технолошки пристап при кој една „поголема“ општина обезбедува ИТ услуги за другите „помали“ локални самоуправи во делот на администрирање и одржување на оваа дигитална алатка. Со оглед на сè помалиот број на достапни ИТ специјалисти, како и ограничените финансиски ресурси кои ги имаат општините, градењето партнерства во форма на меѓуопштинска соработка е совршено решение за предизвикот наречен „дигитална трансформација“. Особено е важно да се нагласи дека платформата LoGeS обезбедува ист број и ист квалитет на е-услуги за граѓаните на сите општини без разлика на нивната големина, со што се почитува принципoт на еднакви можности за сите граѓани.
