Хрватскиот премиер Андреј Пленковиќ денес ќе престојува во еднодневна посета на Македонија. Тој ќе биде придружуван од хрватскиот министер за економија и одржлив развој, Давор Филиповиќ и хрватската парламентарна претставничка на албанското, бошњачкото, црногорското, македонското и словенечкото национално малцинство Емина Лекај Прљаскај.
За време на престојот во Скопје, премиерот Пленковиќ ќе се сретне со македонскиот премиер Димитар Ковачевски, со шефот на државата, Стево Пендаровски и со претседателот на Собранието, Талат Џафери, при што ќе се обрати пред пратениците на свечена собраниска седница.
Пленовиќ ќе се сретне и со претседателот на ВМРО-ДПМНЕ, Христијан Мицкоски, како и со поглаварот на Македонската православна црква, архиепископот Стефан и со бискупот скопски на Католичката црква во Република Северна Македонија Н.В.П. монс. д-р Киро Стојанов.
Официјалната посета на премиерот Пленковиќ ќе заврши со средба со претставници на хрватската заедница и хрватските компании во Македонија.
