Министерот за надворешни работи и надворешна трговија, Тимчо Муцунски, денес и утре ќе ја посети Република Словенија, каде што ќе земе учество на Бледскиот стратешки форум.
Во текот на форумот, Муцунски ќе има обраќање на панел-дискусијата на тема: „Нема регион за младите – време е за промени“, информираа од Министерството за надворешни работи и надворешна трговија.
Форумот ќе ги собере министрите за надворешни работи и младите стручњаци од регионот, обезбедувајќи посебна прилика за справување со предизвиците и испитување на реалните потреби за значајна преобразба.
Освен учеството во официјалната програма, Муцунски ќе биде присутен и на работен доручек со министрите за надворешни работи од регионот, каде што ќе се направи анализа на тековните состојби и проблеми на Западен Балкан.
На маргините на форумот, планирани се и повеќе билатерални средби со министри и претставници на меѓународни организации.
