Шолц го загуби гласањето за доверба на неговата влада – Германија ќе оди на предвремени избори
Предвремените избори сега треба да се одржат на 23 февруари.
Германскиот канцелар Олаф Шолц го загуби гласањето за доверба во парламентот во понеделникот, што го отвори патот за предвремени избори на почетокот на следната година. Исходот беше очекуван, откако владината коалиција на Шолц се распадна во ноември поради спор околу буџетот.
Против Шолц беа дадени вкупно 394 гласови, од кои 207 беа „за“ и 116 воздржани.
Шолц, кој ќе ја води својата Социјалдемократска партија (СПД) на изборите во февруари, наводно се насмевнал кога бил објавен резултатот и му подаде рака на вицеканцеларот Роберт Хабек.
Шолц ја предводи германската влада од декември 2021 година, на чело на таканаречената коалиција „семафор“ со Зелените и Слободната демократска партија (ФДП). Коалицијата сепак се распадна минатиот месец, откако Шолц го разреши својот министер за финансии, Кристијан Линднер, поради несогласувањата за економската и финансиската политика.
Канцеларот го нарече гласањето за доверба како чекор кон обезбедување на предвремени избори, кои првично беа закажани за есента 2025 година. Сега се очекува тој да побара од германскиот претседател Франк-Валтер Штајнмаер да го распушти парламентот и да дозволи општи избори. Новиот датум е веќе одреден за 23 февруари.
СПД и Зелените останаа како де факто малцинска влада и ќе продолжат со оваа улога се додека не се формира нов Бундестаг. Но, тие го немаат парламентарното мнозинство потребно за носење закони.
Главниот политички ривал на Шолц, Фридрих Мерц, кој ја предводи најголемата опозициска партија во земјата, конзервативната Христијанско-демократска унија (ЦДУ) и ќе биде нејзин кандидат за канцелар на следните избори, го поздрави резултатот и го обвини Шолц за слабо лидерство. „Непријатно е како постапивте во Европската унија“, рекол Мерц.
Шолц забележа пад на неговата популарност, при што анкетите покажаа дека мнозинството Германци не се задоволни од неговите перформанси како канцелар, поради што некои медиуми го нарекоа „најнепопуларниот канцелар на сите времиња“.
Германската економија се намалува во последните две години. Во петокот, централната банка на земјата ја намали својата прогноза за раст за следната година на 0,2%, од 1,1% што ги предвиде во јуни, наведувајќи ја натамошната економска стагнација. Регулаторот рече дека сега очекува економијата да се намали за 0,2% оваа година, откако претходно предвидуваше скромен раст од 0,3%.
Ова ќе означи втора последователна година на пад, откако БДП се намали за 0,3% во 2023 година. Минатогодишното намалување се припишува на постојаната инфлација, високите цени на енергијата и слабата странска побарувачка.
Во минатото, германските канцелари и нивните партии користеа гласови за доверба за да ја зајакнат својата позиција на избори. Последните национални истражувања на јавното мислење покажуваат дека поддршката за ЦДУ/ЦСУ е 32%, Алтернатива за Германија (АфД) со 18%, СПД 16%, а Зелените со 14%.
