Секоја партија има право да одлучи дали ќе има кандидат за претседател, изјави Димитар Ковачевски. Тој побара поддршка од прогресивните сили
СДСМ го направи својот чекор во однос на кандидатот за претседател за државата, иако не го соопштува неговото име.
Претседателот на партијата, Димитар Ковачевски денеска изјави дека претседателскиот кандидат ќе се знае на крајот на февруари или на почетокот на март. Тој ќе биде подддржан од коалициските партнери на партијата. А дали ќе биде поддржан и од ДУИ најмногу зависи од интегративците.
Нашиот кандидат сега и во минатото, и нашите влади покажале дека со нас има европска Македонија, Македонија во полноправно членство во НАТО, со другите нема, изјави денеска во Скопје претседателот на СДСМ и поранешен премиер Димитар Ковачевски.
„Колку претседателски кандидати ќе има во државата тоа зависи од политичките партии. Нема да се мешам во тоа дали некоја политичка партија ќе кандидира претедателски кандидат или нема да кандидира, дали некој поединец ќе се кандидира. Ние сме демократско општество и секој кандидат, секоја политичка партија има право да кандидира за секоја функција. Она што знам е дека нашиот претседателски кандидат ќе биде поддржан од политички партии коишто беа со нас во коалиција, кои се со нас во коалиција и коишто ќе бидат на идните избори со нас во коалиција, со коишто веќе отпочнуваме разговори во однос на конкретното настапување на изборите“, рече Ковачевски по учеството на панел дискусија со студенти на тема „На студентско столче: Перспективи за политики, напредок и промена“.
На новинарско прашање тој истакна дека ДУИ има опција или да го поддржи претседателскиот кандидат којшто СДСМ ќе го предложи или да определи свој кандидат за претседател. Таа одлука, според него, треба да ја донесе ДУИ.
