„Без имплементација на овие препораки не гледаме начин како ќе бидат сериозни судските реформи“, рече евроамбасадорот Дејвид Гир
ЕУ бара темелна реформа на Судскиот совет, од изборот на неговите членови, до транспарентноста и одговорноста
Дури 40 препораки испратила оценската мисија на Европската унија за Судскиот совет, по интензивните разговори, проверки на документите и испитување на судската практика во државата. Меѓу нив нема препорака тој да се укине, иако проблемите што ги продуцираа доведоа до скандалозни оценки за неговата работа.
Од препораките 17 можат да се имплементираат на краток рок, бидејќи треба да ги донесе самиот Судскиот совет, а останатите 23 бараат законски, а некои и уставни измени, за кои ќе треба подолго време.
Евроамбасадорот Дејвид Гир презентирајќи дел од препораките што може да биде достапен за јавноста, порача дека тие се екстензивни и дека ги адресираат „корените и влијанијата“ во Судскиот совет и генерално во судството во земјата. Според оценката, предизвиците во судството се резултат на акумулираните проблеми со години и на отсуството на добра практика. Судството, порача тој, е на критична точка, а препораките ако не се имплементираат со политичка волја, интегритет и транспарентност – нема да бидат корисни воопшто.
Попрецизно, извести Гир, една од препораките се однесува на тој кој може да биде член на Судскиот совет, кои да бидат условите, колку долго и што е точната дефиниција на славниот услов, како што рече Distinglished lawyer – истакнат адвокат. Други препораки се однесуваат на тоа како да се избираат членовите според систем заснован на заслугите, колку гласови треба да добие секој член и како да биде транспарентен процесот.
